محکمہ موسمیات کی موسلادھار بارش کی پیشگوئی

محکمہ موسمیات نے آئندہ 24 گھنٹوں کے دوران پنجاب کے مختلف علاقوں میں موسلا دھار بارش کی پیشگوئی کردی ہے۔

محکمہ موسمیات کے مطابق 2 مارچ تک لاہور، گوجرانوالہ، فیصل آباد ، گجرات ، نارووال میں بادل کھل کر برسیں گے، ٹوبہ ٹیک سنگھ ، شیخوپورہ، قصور ، ننکانہ صاحب میں بھی بارشیں ہوں گی۔

میٹ آفس کے مطابق ملکہ کوہسار مری میں برف باری اور لینڈ سلائیڈنگ کا خدشہ ہے، جس کے بعد تمام متعلقہ اداروں کو ہائی الرٹ جاری کردیا گیا ہے۔

آج رات لاہور ،گوجرانوالہ ، فیصل آباد ، گجرات ، نارووال ، ٹوبہ ٹیک سنگھ ، شیخوپورہ قصور ، ننکانہ صاحب میں بادل برسنے کا امکان ہے، اسی دوران چند مقامات پر موسلادھار بارش اور بعض مقامات پر ژالہ باری بھی ہوسکتی ہے۔

دوسری جانب آزاد کشمیر میں جمعرات کی علی الصبح سے ہلکی بارش اور برفباری کا سلسلہ دوسرے روز بھی جاری ہے۔ بالائی وادی نیلم کے مختلف علاقوں میں برفباری سے سردی کی شدت میں اضافہ ہوگيا ہے۔

مظفرآباد اور گرد و نواح میں وقفے وقفے سے بارش جاری ہے۔ محکمے کے مطابق ہلکی برفباری اور بارش آج بھی پورا دن جاری رہے گی۔ اس دوران وادی لیپہ کے بلند پہاڑوں پر بھی برفباری سے موسم مزید سرد ہوگیا ہے۔

لاہور کی بات کی جائے تو جہاں ابر رحمت سے فصلوں اور سبزیوں کو فائدہ پہنچ رہا ہے وہیں موسمی بیماریوں میں بھی کمی ہونے لگی ہے۔ گزشتہ روز لاہور میں ہونے والی بارش کے بعد فضائی آلودگی میں کمی واقع ہوئی ہے۔ محکمہ موسمیات کے مطابق شہر میں آج بھی بارش کا امکان ہے۔

from Samaa - Latest News https://ift.tt/Y4RcWI2