تحریک انصاف حکومت نےگوادر پورٹ کی ترقی کے نام پراربوں روپے کا ضیاع کیا،وزیراعظم

وزیراعظم شہبازشریف نے کہا ہے کہ گوادر کے لوگوں کے لیے کوئی بھی پانی اور بجلی کا منصوبہ مکمل نہیں کیاجاسکا ہے۔

اپنی ٹویٹ میں وزیراعظم شہباز شریف نے بتایا کہ گوادرکےحالیہ دورے کے دوران مجھے احساس ہوا کہ تحریک انصاف کی حکومت نے کس طرح گوادر کے لوگوں کا نقصان کیا۔ اربوں روپے اور قیمتی وقت ضائع کرنے کے ساتھ گزشتہ حکومت گوادر کے مقامی لوگوں جنہوں نے بندرگاہ کی تعمیر کیلئے قربانیاں دیں، ان کے لئے بجلی اور پانی کے لیے ایک بھی منصوبہ مکمل کرنے میں ناکام رہی۔

وزیراعظم نے مزید کہا کہ گوادرائیرپورٹ اورگوادر بندرگاہ کی بھی یہی صورتحال ہے۔ بندرگاہ پر ڈریجنگ نہ کرنے کی وجہ سے کوئی بڑا مال بردار بحری جہاز لنگر اندازنہیں ہو سکتا۔

انھوں نےگوادریونیورسٹی،ایئرپورٹ اور پانی کیلئے ڈی سیلینیشن پلانٹ کی فوری تعمیرمکمل کرنے کی ہدایات بھی جاری کردیں۔

وزیراعظم نے مزید کہا کہ میں پورے یقین سے کہہ سکتا ہوں کہ پاکستان کی مجموعی ترقی بلوچستان کے امن، استحکام اور ترقی سے منسلک ہے۔ ہماری اتحادی حکومت بلوچستان کی صوبائی حکومت اور مقامی عمائدین کے بھرپور تعاون سے مستقبل کے لائحہ عمل کے تعین کیلئے پر عزم ہے۔

وزیراعظم شہباز شریف نے گزشتہ روز گوادر کا دورہ کیا تھا۔ اپنے دورے کے دوران وزیراعظم پاکستان نے ایسٹ بے ایکسپریس وے کا افتتاح کیا اور ماہی گیروں کے لئے خصوصی پیکیج کا اعلان کیا۔

گوادرمیں وزیراعظم چائنہ بزنس سینٹربھی گئے جہاں انہوں نے چینی کمپنیوں کے حکام سے ملاقاتیں کیں۔

اس کےعلاوہ وزیراعظم نے 12لاکھ گیلن پانی یومیہ فراہم کرنےوالےڈی سیلینائزیشن پلانٹ کا سنگ بنیاد رکھا اور گوادر کے 3 ہزار سے زائد گھرانوں کے لئے سولر پینل دینے کے منصوبے کا افتتاح کیا۔

from Samaa - Latest News https://ift.tt/TORGeq0