کھلی عدالتی مداخلت ریاست کو چلنے نہیں دیتی، سعد رفیق

پاکستان مسلم لیگ نواز (ن) کے رہنما اور وفاقی وزیر خواجہ سعد رفیق نے کہا ہے کہ انتظامی معاملات میں کھلی عدالتی مداخلت اور انصاف کے دوہرے معیار ریاست کو چلنے نہیں دیتے۔

لاہور میں بدھ 22 فروری کو میڈیا سے گفتگو میں لیگی رہنما خواجہ سعد رفیق نے کہا کہ بہروپیے کیلئے صادق اور امین کے جھوٹے سرٹیفکیٹ اور نواز شریف کیلئے بلیک لاء ڈکشنری ہے۔

ان کا کہنا تھا کہ محض ایک تاخیر پر شاہد خاقان عباسی کے ناقابل ضمانت وارنٹ گرفتاری جاری کر دیے گئے مگر ضمانت دینے کیلئے لاڈلے کا کئی دن، گھنٹوں انتظار کیا گیا۔

سابق وزیراعظم پر تنقید کرتے ہوئے وفاقی وزیر کا کہنا تھا کہ عمران خان خود ضمانتیں کرا رہے ہیں اور ساتھیوں کو کہتے ہیں جیل جاو، عمران خان پر کسی کو اعتبار نہیں، عمران خان جن کو گالیاں دیتے ہیں ضرورت پڑنے پر انہیں سر پر بٹھا لیتے ہیں۔

اس موقع پر انہوں نے سابق وزیراعلیٰ پنجاب چوہدری پرویز الہیٰ کا ذکر کرتے ہوئے کہا کہ پی ٹی آئی والوں کو پرویز الہٰی مبارک ہو۔

انہوں نے یہ بھی کہا کہ اگر کوئی ریاست کیخلاف کھیل کھیلے گا تو کیا قانونی کارروائی نہیں ہوگی؟ ملک میں سیاسی انتقام ختم ہونا چاہیے، پارٹی کی تمام لیڈر شپ کو جیلوں میں ڈالا ہمیں کبھی روتے ہوئے دیکھا؟ یہ ٹی وی پر آ کے روتے ہیں کہ ہمارے بچے ہیں، ہمارے بھی بچے تھے۔

from Samaa - Latest News https://ift.tt/UNjhgOb